महिला बचत गट मेळावा :- स्वावलंबनासाठी नवीन व्यवसाय कल्पना, महिलांना उत्स्फूर्त पाठिंबा
अमळनेर : -झेप फाउंडेशन आणि शिरीष दादा मित्र परिवार यांच्या संयुक्त विद्यमाने महिला बचत गट मेळावा मोठ्या उत्साहात पार पडला. ग्लोबल इंग्लिश मिडीयम हायस्कूल येथे झालेल्या या कार्यक्रमाला हजारो महिलांनी उत्स्फूर्त प्रतिसाद दिला. महिलांनी शिरीष दादांच्या महिला सक्षमीकरणाच्या योजनांना पूर्ण पाठिंबा दिला, तर आंतरराष्ट्रीय उद्योजिका आणि झेप फाउंडेशनच्या अध्यक्षा डॉ. रेखा चौधरी यांनी महिलांसाठी नवीन व्यवसाय कल्पनांची ओळख करून दिली.
डॉ. रेखा चौधरी यांची व्यवसाय कल्पना :-
डॉ. रेखा चौधरी यांनी महिलांसाठी घरी बसून करता येणाऱ्या व्यवसाय कल्पना सादर केल्या. यामध्ये ”दिया बाती प्रॉजेक्ट मध्ये शेणापासून दिवे” नावाचा व्यवसाय विशेष आकर्षण ठरला. हा व्यवसाय गायच्या शेणापासून दिवे तयार करण्याचा असून, हा एक स्वच्छ, सोपा आणि कमी खर्चात सुरू करता येणारा व्यवसाय आहे.
”काऊडंग दिवा ” हा डॉ. रेखा चौधरी यांचा ब्रेनचाइल्ड असून, त्यांनी याआधी इतर राज्यांतील अनेक महिलांना याच व्यवसायाच्या माध्यमातून सक्षम बनवलं आहे.** त्यांच्या या कल्पनेमुळे महिलांमध्ये आत्मनिर्भरतेबद्दल नवीन प्रेरणा निर्माण झाली.
महिला सक्षमीकरणासाठी नवीन दृष्टीकोन:-
डॉ. रेखा चौधरी यांनी सांगितले की, ”महिलांना लहान व्यवसाय सुरू करण्यासाठी कौशल्य आणि योग्य मार्गदर्शनाची गरज आहे. माझे काम महिला सक्षमीकरणात आहे, तालुक्यातील जास्तीत जास्त महिलांसाठी लघुउद्योग निर्माण करणे, जेणेकरून त्या कोणाकडेही हात पसरू नयेत आणि सरकारी योजनेवर अवलंबून न राहता स्वावलंबी होऊन स्वत: कमाई करू शकतील.मी जेवढं शक्य आहे, तेवढं महिलांसाठी करत राहीन.”त्यांनी स्वावलंबनासाठी विविध संधींची ओळख करून दिली, ज्या महिलांना घरबसल्या आर्थिकदृष्ट्या सक्षम बनवू शकतात.
महिलांचा शिरीष दादांच्या योजनांना पाठिंबा:-
महिलांनी शिरीष दादांच्या महिला सक्षमीकरणाच्या योजनांना मोठ्या प्रमाणावर पाठिंबा दिला. ”दादा निवडून आल्यावर महिलांसाठी रोजगाराच्या अधिक संधी मिळतील,”असा विश्वास महिलांनी व्यक्त केला.
